غلام محمد وامق
جو ہو رہا ہے ہم پہ ستم دیکھتے رہو ۔
ہوگی تمہاری آنکھ بھی نَم دیکھتے رہو ۔
مانا نظر میں لوگوں کی معصوم ہیں جناب ۔
اِک روز ختم ہوگا بھرم دیکھتے رہو ۔
منزل سے پہلے رکنے کے عادی نہیں ہیں ہم ۔
اب اُٹھ چکے ہیں اپنے قدم دیکھتے رہو ۔
مکر و فریب دیکھے ہیں ہم نے بہت مگر ۔
ہوگا نہ اپنا حوصلہ کم دیکھتے رہو ۔
اِس ملک کے نظام کو بدلو وگرنہ تم ۔
افلاس و بھوک و رنج و الم دیکھتے رہو ۔
ہم وہ ہیں گھر جلا کے بھی جو روشنی کریں ۔
ہوگا اندھیرا ظلم کا کم دیکھتے رہو ۔
توحید کا جو جام پیا ہم نے دوستو ۔
مٹنے لگے ہیں جھوٹے صنم دیکھتے رہو ۔
مقتل میں ہو یا بزم میں وامِق ہے سرفراز ۔
ہوگا کبھی نہ سَر مرا خم دیکھتے رہو ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفعول فاعلات مفاعیل فاعلن ۔
بحر ۔ مضارع مثمن اخرب مکفوف محذوف ۔
شاعر ۔ غلام محمد وامق ۔
دسمبر سال 1998ء میں کہی گئی غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
