غلام محمد وامق
اے کاش چمن میں پھر، میرے وہ بہار آئے ۔
پھر مہکے چمن سارا ، پھولوں پہ نکھار آئے ۔
کیا محفلِ رنگیں اب تسکین ہمیں دے گی ۔
ہم دشت نَوَردی میں اِک عمر گزار آئے ۔
ہر لمحہ گزرتا ہے یادوں کے سہارے جب ۔
ہو دل کو سکوں کیونکر اور کیسے قرار آئے ۔
اے دوست تری یادیں اس دل سے نہیں جاتیں ۔
کہنے کو تو ہم اپنے احساس کو مار آئے ۔
ہر گُل کے محافظ ہیں جب خار ہی گلشن میں ۔
پھر کیوں نہ بھلا ہم کو ان کانٹوں پہ پیار آئے ۔
دعوائے مسیحائی، ہے تجھ کو بہت لیکن ۔
لا کوئی دوا جس سے اِس دل کو قرار آئے ۔
یہ کھیل محبّت کے بے عقل و خرد ہیں سب ۔
ہم عقل و خرد وامِق اِس کھیل میں ہار آئے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفعول مفاعیلن مفعول مفاعیلن ۔
بحر۔ ہزج مثمن اخرب سالم ۔
شاعر ۔ غلام محمد وامق ۔
مئی سال 1984ء میں کہی گئی غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
