غــــزل
غلام محمد وامق
ایک ایک کرکے چھوڑ مجھے ہم سفر گئے ...
شاید وہ راہِ شوق کی سختی سے ڈر گئے ...
بکھرے تھے راہِ شوق میں کانٹے تو کیا ہوا ...
ہم آبلہ پا کانٹوں پہ چل کر مگر گئے ...
میں احترامِ حسن میں خاموش جو رہا ...
تہمت تمام میرے ہی وہ نام دھر گئے ...
اس سنگدل کے سامنے رویا بہت مگر ۔
آنسو تمام میرے وہاں بے اثر گئے ۔
تم وقت کی لگام جو تھامو تو دیکھ لو
کیسے نقوش دل سے بھی مِٹ کر اتر گئے ۔
رہتا ہمیشہ کون ہے، دنیا سرائے ہے ...
کچھ لوگ باقی ہیں ابھی، کچھ اپنے گھر گئے ...
پوچھے گا کون آج کے ظالم نظام سے
کیوں بھوک سے ہی دیکھئے کچھ لوگ مر گئے ۔
وامِق، نہ پھول کھِل سکا کوئی، بقولِ میر ...
" اب کے بھی دن بہار کے یوں ہی گزر گئے " ...
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفعول فاعلات مفاعیل فاعلن ۔
بحر ۔ مضارع مثمن اخرب مکفوف محذوف
شاعر ـ غلام محمد وامِق
جولائی سال 1984ء میں کہی گئی میری غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
