۔۔۔۔۔۔۔۔۔۔۔۔۔۔ غزل ۔۔۔۔۔۔۔۔۔۔
غلام محمد وامق
میری نظروں کی پاکیزگی پر اگر کوئی تہمت لگائے تو میں کیا کروں ؟
جب دعا مانگوں تو لب پہ بے ساختہ بس ترا نام آئے تو میں کیا کروں ؟
مجھ کو شوقِ نظارہ زیادہ نہ تھا اور محبت کا کوئی ارادہ نہ تھا ۔۔۔
میں تو نظریں بچا کر گزرتا مگر کوئی پردہ اٹھائے تو میں کیا کروں ؟
میرے لفظوں پہ کوئی توجہ نہ دو میرے چہرے کو تم غور سے دیکھ لو ۔۔۔
تم سے اظہارِ الفت کے الفاظ گر یہ زباں کہہ نہ پائے تو میں کیا کروں ؟
میں نے گلشن میں خاروں سے کی دوستی میری خواہش مگر یہ کبھی بھی نہ تھی ۔۔۔
پھول تو پھول ہے، اس کی خوشبو بھی گر مجھ سے دامن بچائے تو میں کیا کروں ؟
آ زَمایا بہت میں نے یاروں کو بھی غم گساروں کو بھی اپنے پیاروں کو بھی ۔۔۔
جب مصیبت پڑے تو کوئی شخص بھی پاس میرے نہ آئے تو میں کیا کروں ؟
اُس کے آنے کے لاکھوں وسیلے کئے میں نے دن رات کتنے ہی حیلے کئے ۔۔۔
محفلیں اس کی خاطر سجائیں بہت اب وہ خود ہی نہ آئے تو میں کیا کروں ؟
کر کے سجدے خدا کو منا ہی لیا اپنی عقبیٰ کو آخر بنا ہی لیا ۔۔۔
یار کو دل نے لاکھوں ہی سجدے کئے وہ ستم پھر بھی ڈھائے تو میں کیا کروں ؟
میں ترے ناز و نخرے اٹھاتا رہا تیری ہر بات پر سر جھکاتا رہا ۔۔۔
پھر بھی تُو مجھ سے اے سنگدل سوچ تو بے وجہ روٹھ جائے تو میں کیا کروں ؟
میں نے چاہا تھا کشتی سلامت رہے ہر مسافر کے دل میں محبت رہے ۔۔۔
میں نے اپنی سی کوشش تو کی تھی مگر ناخدا ہی نہ چاہے تو میں کیا کروں ؟
تم نہ قسمیں اٹھاؤ مجھے ہے یقیں، اِس مکاں میں ازل سے ہے انساں مکیں ۔۔۔
پھر بھی انساں کی دنیا میں انسانیت گر مجھے مل نہ پائے تو میں کیا کروں ؟
لوگ قصّے وفا کے سناتے رہے، نام وامِق کا بھی لب پہ لاتے رہے ۔۔۔
اور جفاؤں کے قصوں میں اے بے وفا گر ترا نام آئے تو میں کیا کروں ؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فاعلن فاعلن فاعلن فاعلن فاعلن فاعلن فاعلن فاعلن ۔
بحر۔ متدارک مثمن سالم مضاعف
شاعر ۔ غلام محمد وامِق ، محراب پور سندھ ۔۔۔
اگست سال 1987ء میں لکھی گئی ۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
