غلام محمد وامِق
ممکن ہے ہم سے بھی پڑے، تم کو بھی کام کچھ ۔
سورج بھی دن میں کچھ ہے تو ہوتا ہے شام کچھ ۔
لایا ہوں دل سجا کے میں بازارِ حسن میں ۔
اے تاجدارِ حُسن، لگا تُو بھی دام کچھ ۔
سیکھا ہے ہم نے درسِ وفا تجھ سے بے وفا ۔
کرتے ہیں اِس لئے بھی ترا احترام کچھ ۔
بادِ صبا! وہ سوئے چمن آ رہے ہیں آج ۔
پھولوں سے یہ کہو کہ کریں اہتمام کچھ ۔
مجھ سے نہ پوچھ میرے غموں کی یہ داستان ۔
بے پردہ ہوں گے پردہ نشینوں کے نام کچھ ۔
تیرا شباب دیکھ کے پیتا شراب کون ؟
ٹوٹے پڑے ہیں ساقی ترے در پہ جام کچھ ۔
وامِق تری حیات ادھوری ہے جس طرح ۔
قصّے پڑے ہیں یوں ہی ابھی نا تمام کچھ ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفعول فاعلات مفاعیل فاعلن ۔
مفعول فاعلات مفاعیل فاعلات ۔
بحر ۔ مضارع مثمن اخرب مکفوف محذوف ۔
شاعر ۔ غلام محمد وامِق ۔
مارچ سال 1984ء میں کہی گئی غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
