=== غزل ===
غلام محمد وامق
دنیا میں رہنا ہے تو رہو عِزّ و شان سے ۔
چلتا نہیں ہے کام یہاں جھوٹی آن سے ۔
جس کے لئے ہے دیکھ پریشان رات دن ۔
جانا پڑے گا دور تجھے اس مکان سے ۔
حق کا عَلَم بلند کیا جس نے بھی یہاں ۔
دیکھو اَمَر ہوا ہے وہی کتنی شان سے ۔
جس آسماں سے ہوتے ہیں سیراب گلستاں ۔
گرتی ہیں بجلیاں بھی اسی آسمان سے ۔
دِل میں اگر نہ ہو ترے کچھ عزم و حوصلہ ۔
پھر کیا کرے گا تُو کسی زورِ بیان سے ۔
جس شمع پر پتنگے ہیں سو جان سے فدا ۔
آہیں ابھر رہی ہیں اسی شمع دان سے ۔
ہو مقصدِ حیات فقط جب کہ امتحاں ۔
کیسے ڈرے گا کوئی بھلا امتحان سے ۔
ہوتے ہیں دو جہاں میں وہی لوگ سرخرو ۔
روشن ہیں جن کے راستے نورِ قران سے ۔
وامِق ہجومِ یار میں اِک ہم سفر نہیں ۔
ہوگا اکیلا جائے گا جب اس جہان سے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفعول فاعلات مفاعیل فاعلن ۔
بحر ۔ مضارع مثمن اخرب مکفوف محذوف ۔
شاعر ۔ غلام محمد وامق ۔
اکتوبر سال 1982ء میں کہی گئی غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
