***** غزل *****
غلام محمد وامِق
گھٹن کس قدر بڑھ رہی ہے یہاں ـ
یہ کیسی زمیں ہے، یہ کیسا مکاں ـ؟
اخوت کے سب مِٹ گئے ہیں نشاں ـ
ہر اِک آنکھ سے ہے، عداوت عیاں ـ
اسی کے ہیں پاؤں میں اب بیڑیاں ـ
جو مظلوم لوگوں پہ ہے، مہرباں ـ
جو حق بات کہدی کسی نے یہاں ـ
سرِعام اس کی کٹی ہے زباں ـ ـ
بمشکل بنایا تھا اِک آشیاں ــ ـ
گری اس پہ بھی ظلم کی بجلیاں ـ
جہاں گُل کا گُلچیں بنے باغباں ـ
نہیں چاہئیے ہم کو وہ گلستاں ـ
اُٹھو ظالموں کا مٹادو نشاں ـ
نہیں کام دیں گی، یہ آہ و فغاں ـ
انہی پر بغاوت کا الزام پے ــ
جو حق بات کرتے ہیں سب سے بیاں ـ
نہ جانے حقیقت ہے کیا زندگی ـ؟
نہ جانے مکاں ہے، یا ہے لامکاں ـ
ہر اِک در پہ دیتا ہے، دستک عبث ـ
ترا کون وامِق! بنے گا یہاں ـ؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فعولن فعولن فعولن فَعَل ۔
بحر۔ متقارب مثمن محذوف ۔
نومبر سال 1986ء میں کہی گئی غزل ۔۔۔
شاعر ۔ غلام محمد وامِق ، محراب پور سندھ ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
