=== رنگین غزل ===
غلام محمد وامِق
عجب دوست سے مجھ کو پالا پڑا ہے ...
ہمہ وقت سر پر، وہ میرے کھڑا ہے ...
وہ اِک روز تونے جو پتھر تھا مارا ...
میرے گھر میں اب تک وہ پتھر پڑا ہے ...
یوں بتیسی فِٹ دیکھی بوڑھے دہن میں ...
کہ جیسے انگوٹھی میں ہیرا جَڑا ہے ...
فصیلِ محبت کو تُو پار کرلے ...
یہ مت دیکھ، دربان در پر کھڑا ہے ...
جو دس سال تجھ سے بڑی ہے تو کیا ہے؟
محبت میں چھوٹا نہ کوئی بڑا ہے ...
عجب حال گاؤں کی معشوق کا ہے ...
بغل میں ہے بچہ، تو سر پر گھڑا ہے ...
محلے میں کوئی بھی رہنے نہ دیتا ...
اگر میں یہ کہتا، کہ بندہ چھڑا ہے ...
جو مار اپنی بیوی سے کھاتا ہے گھر میں ...
سڑک پر وہ غُنڈہ بھی سب سے بڑا ہے ...
کہا تھا یہ سچ، اس نے شادی سے پہلے ...
کہ عقلوں پہ مَردوں کی، پردہ پڑا ہے ...
نہیں تیزتر ہم ہی غصے کے، وامِق ...
مزاج اپنی بیوی کا بھی کچھ کَڑا ہے ...
ــــــــــــــــــــــــــــــــــــــــــ
فَعُولن فَعُولن فَعُولن فَعُولن ۔
بحر ۔ متقارب مثمن سالم ۔
ستمبر 1984ء، میں کہی گئی رنگین غزل ۔
شاعر ـ غلام محمد وامِق محراب پور سندھ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
