***** غــــزل ****
غلام محمد وامِق
خفا تجھ سے ہونا بھی چاہوں تو کیسے؟
خود اپنے سے ہی میں جو روٹھوں تو کیسے؟
نہیں مجھ کو فرصت تجھے دیکھنے سے ـ
کسی اور جانب جو دیکھوں تو کیسے؟
مجھے تو فقط خواب میں ہی سکوں ہے ـ
میں خوابوں کی دنیا سے جاگوں تو کیسے؟
ہے دریا میں برپا یہ طوفاں بلا کا ۔۔۔
میں کچے گھڑے پر جو آؤں تو کیسے؟
مجھے ہے خبر، موت برحق ہے لیکن !
میں قاتل کو خود ہی بلاؤں تو کیسے؟
یہ حیلے بہانے، نہیں جانتا میں ـ
کسی کو اگر آزماؤں، تو کیسے؟
اجل آگئی، شام سے پہلے پہلے ـ
تھا ملنے کا وعدہ، نبھاؤں تو کیسے؟
رُخِ یار کو، دیکھتی ہے یہ اکثر ـ
میں اپنی نظر کو، جو چوموں تو کیسے؟
سرِ بزم اس نے، مجھے جب پکارا ـ
میں لوگوں سے خود کو چھپاؤں تو کیسے؟
مجھے ربِِّ عالَم پہ کامل یقیں ہے ـ
کسی سے اگر کچھ میں چاہوں تو کیسے؟
غزل تو یہ وامِق، مکمل ہے لیکن ـ
یہ جانِ غزل کو، سناؤں تو کیسے؟
ــــــــــــــــــــــــــــــــــــــــــ
فعولن فعولن فعولن فعولن ۔
بحر ۔ متقارب مثمن سالم ۔
شاعر ـ غلام محمد وامِق، محرابپور سندھ ـ
جون 1985ء میں کہی گئی غزل ...
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
