=== کھٹی میٹھی غزل ===
غلام محمد وامِق
تجھ کو میری جان سلامت، اللہ رکھے ...
حشر تلک یہ حسنِ قیامت اللہ رکھے ...
مولا تیرے موٹاپے کی خیر کرے ۔۔۔
اور تیری بارعب جسامت، اللہ رکھے ...
دس بچے تُو پیدا کرکے شرمائی ہے ...
تیرا یہ احساسِ ندامت، اللہ رکھے ...
حسن کی دولت عام لٹاتی پھرتی ہے تُو ...
تیرا یہ اندازِ سخاوت اللہ رکھے ...
اللہ رکھّی، بھاگ گئی ہے تیرے گھر سے ۔
دیکھ کے تیری اتنی شرافت اللہ رکھے ...
روز تمہارے مُنہ سے گالی سنتے ہیں ہم ...
قائم تیری ہم سے عداوت، اللہ رکھے ...
لیڈر، تجھ سے قوم کہاں تک بچ پائے گی؟ ...
تیرا یہ اندازِ سیاست، اللہ رکھے ...
دیکھو تیری بال کٹنگ کی شاپ پہ کب سے ...
بیٹھا ہوں میں، کردے حجامت، اللہ رکھے ...
اپنے دل کے زخم چھپا کر ہنستے ہو تُم ...
ہر دم وامِق، تم کو سلامت اللہ رکھے ...
ــــــــــــــــــــــــــــــــــــــــ
فعلن فعلن فعل فعولن فعل فعل
فعل فعولن فعل فعولن فعل فعل
فعلن فعلن فعلن فعلن فعل فعل
بحر ۔ ہندی متقارب مسدس مضاعف ۔
شاعر ۔ غلام محمد وامق ۔
مئی 1986ء، میں کہی گئی ـ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
