=== غزل ===
غلام محمد وامِق
ہم گردشِ حالات پہ رویا نہیں کرتے ۔
گزرے ہوۓ لمحوں کو پکارا نہیں کرتے ۔
ہم اپنی وفاٶں کو کبھی گاتے نہیں ہیں ۔
اور تیری جفاٶں کا بھی چرچا نہیں کرتے ۔
جو دل میں ہے، لازم تو نہیں ہو وہ زباں پر ۔
ہر شخص کی ہر بات کو مانا نہیں کرتے ۔۔۔
جو لوگ کسی اور کے دکھ درد پہ روۓ ۔
وہ اپنے غموں پر کبھی رویا نہیں کرتے ۔۔۔
معراج ہے پھولوں کی مزاروں پہ بکھرنا ۔۔۔
کانٹے کبھی اس شان سے بکھرا نہیں کرتے ۔
بن جاٶ نہ دنیا کی نگاہوں میں تماشا ۔۔۔
ہم تم کو بھی اس خوف سے دیکھا نہیں کرتے ۔
کیوں قسمیں اٹھاتے ہو بناتے ہو بہانے ۔۔۔
ہم تیری کسی بات کو پرکھا نہیں کرتے ۔۔۔
ہم شوق سے مرجاٸیں گے گر تیری خوشی ہے۔
دل غیر کا بھی ہم تو دکھایا نہیں کرتے ۔۔۔
للہ ! ذرا ٹھہرو تو دو چار گھڑی اور ۔۔۔
امرت میں کبھی زہر ، ملایا نہیں کرتے ۔۔۔
ہیرے کو پرکھنے کا کہاں سب کو سلیقہ ۔
ہر شخص کو ہم شعر ، سنایا نہیں کرتے ۔۔۔
دنیا کہاں سمجھے گی تیرے دل کا فسانہ ۔۔۔
وامِق ! یہ نہاں راز بتایا نہیں کرتے ۔۔۔
ــــــــــــــــــــــــــــــــــــــــــــــ
مفعول مفاعیل مفاعیل فعولن ۔
بحر۔ ہزج مثمن اخرب مکفوف محذوف ۔
شاعر۔ غلام محمد وامق ۔
اکتوبر ۔ 1987 میں کہی گٸی، غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
