غلام محمد وامق
کہیں کیا جو دنیا میں ہم دیکھتے ہیں ،
شب و روز رنج و الم دیکھتے ہیں ۔
عجب کھیل نظروں کا ہم کھیلتے ہیں ،
وہ ہم کو نہ دیکھیں تو ہم دیکھتے ہیں ۔
بظاہر تو خوش ہیں ہمیں چھوڑ کر وہ
مگر ان کی آنکھیں بھی نم دیکھتے ہیں ۔
یہی رسمِ دنیا ہے یارو یہاں پر ،
محبت کے بدلے ستم دیکھتے ہیں ۔
یہ مانا کہ خنجر اٹھایا ہوا ہے ،
مگر آنکھ تیری بھی نم دیکھتے ہیں ۔
یہ تیری نگاہِ کرم کا ہے حاصل ،
زمانے کو زیرِ قدم دیکھتے ہیں ۔
جُنوں کی یہ حد ہے کہ اب آئینے میں ،
تمہیں ہم تمہاری قسم دیکھتے ہیں ۔
وہ آئے ہیں وامِق عیادت کو لیکن ،
کسے ساتھ اُن کے یہ ہم دیکھتے ہیں ؟ ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فعولن فعولن فعولن فعولن ۔
بحر ۔ متقارب مثمن سالم ۔
شاعر ۔ غلام محمد وامق ، محراب پور سندھ ۔
یہ غزل جون سال 1983ء میں کہی گئی تھی ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
