ھریانوی نظم
" آپنَے دیس کا حال "
غلام محمد وامِق
مھارَے دیس کی ماٹی مَیں تَے لِکڑَیں دیکھو ھیرے موتی ۔
کھاجَیں سب یہ مال لٹیرے قوم پھرَے سَے روتی روتی ۔
مِل جُل کَے نَیں لُٹ ٹیں ھام نَیں حاکم مھارے اِیسے اِیسے ۔
اِسے وجہ سَے مانگ کَے کھاوَیں ھالی ار مجدور بی روٹی ۔
سب پَے اے مانگَیں سَیں یہ قرضہ نام عوام کا لَے لَے کَے نَیں ۔
پھیر بی آپنے لوگاں کی یَیں کھاوَیں کر کَے تِکّہ بوٹی ۔
خان بڈیرے بَن جَیں سَیں یَیں خون چوس کَے مجبوراں کا ۔
مال پرایا کھا کھا کَے نَیں نیاڑ بی ھوجَے اِن کی موٹی ۔
عیش کَرَیں یہ بُڈ ڈے ھَوکَے، جاکَے باھر کے مُلکاں مَیں ۔
گات پَے مھارَے چھوڈی کونی اِن نَیں چھوٹی سی لنگوٹی ۔
کر کَے مال جخیرہ اِن نَیں کردی دیکھو مہنگائی ۔
پَیچ جو اِن کے کَسے جاوَیں تو سب نَیں مِل جَے گی روٹی ۔
اللّٰہ کی ھر نعمت سَے اِس دیس مَیں پھیر بی کیوں وامِق ؟
گات پَے کوئے لَتّا کونی قسمت ھوگی کیوں کھوٹی ؟
ـــــــــــــــــــــــــــــــــــ
بحر- متقارب مثمن مضاعف ۔
پہلے دو اشعار - متقارب اثرم مقبوض محذوف مضاعف ۔
شاعر - غلام محمد وامِق ۔
مورخہ 25 ستمبر 2025ء کو مکمل ہوئی ۔
हरियाणवी कविता
आप्णे देस का हाल
ग़ुलाम मुहम्मद वामिक़
म्हारे देश की माट्टी म्हं तै लिकड़ैं देक्खौ हीरे-मोत्ती ।
खा जैं सब यें माल़ लुटेरे क़ौम फिरै सै रोत्ती- रोत्ती ।
मिल जुल कै नै लुट्टैं हाम्नैं हाकिम म्हारे इसे-इसे ।
इसे वजह सै मांग कै खावैं हाल़ी अर मजदूर बि रोट्टी ।
सबपै ए मांग्गैं सैं यें क़र्ज़ा नाम अवाम का ले ले कै नै।
फेर बि आप्णे लोगां की यें खावैं कर कै तिक्का-बोट्टी ।
ख़ान बडेरे बण जैं सैं यें खून चूस कै मजबूरां का ।
माल पराया खा खा कै नै नियाड़ बि हो जै इनकी मोटी ।
ऐश करैं यें बुड्डे हो कै, जा कै बाहर के मुल्कां मं ।
गात पै म्हारे छोड्डी कोनी इन नै छोट्टी सी लंगोट्टी ।
कर कै माल जखीरा इन नै कर दी देक्खो महंगाई।
पेच जो इनके कसे जावैं तो सब नै मिल जै गी रोट्टी ।
अल्लाह की हर नेमत सै इस देश मं फेर बि क्यूं वामिक़ ।
गात पै कोए लत्ता कोनी किस्मत होगी क्यूं खोट्टी ? ।
कवि - ग़ुलाम मुहम्मद वामिक़
