===== غـــــز =====
غلام محمد وامِق
اِس دنیا میں پیار کا مطلب ہم کو بھی سمجھائے کوئی ...
پیار میں کوئی منزل پائے، راہ میں ٹھوکر کھائے کوئی ...
دِل پر جتنے زخم ہیں کھائے، وہ سب کھائے اپنوں سے ...
پیار و محبت کی باتوں سے اب نہ ہمیں بہلائے کوئی ...
جیون کی راہوں میں اکثر ایسے لوگ بھی مِلتے ہیں ...
جیسے غم کے اندھیاروں میں پیار کے دیپ جلائے کوئی ...
بات بنانے سے کیا حاصل، وعدے پر تم آ نہ سکے ...
ملنے والے مِل لیتے ہیں، راہ میں طوفاں آئے کوئی ...
دنیا میں خوشیاں ہی نہیں ہیں، رنج و الم بھی ملتے ہیں ...
لیکن تیری آنکھوں سے کبھی آنسو نہ بہہ جائے کوئی ۔۔۔
کبھی کبھی تو پیار کا وعدہ، بن جاتا ہے تاج محل ...
اور کہیں پر پیار کی باتیں کر کے بھی پچھتائے کوئی ...
ہے یہ حقیقت، دیکھو یارو! قسمت کی بھی قسمت ہے ...
قسمت سے دولت پا کر بھی، دل کا چَین نہ پائے کوئی ...
وامِق! تیرا کون یہاں پر، کون کسی کے ساتھ چلے؟ ...
کہنے کو ہے دنیا ساتھی، لیکن ساتھ نبھائے کوئی ...
ـــــــــــــــــــــــــــــــــــ
بحر ۔ ہندی / متقارب مثمن مضاعف
فعلن فعلن فعل فعولن فعلن فعلن فعلن فعلن
فعل فعولن فعلن فعلن فعل فعولن فعل فعل ۔
فعل فعولن فعل فعولن فعل فعولن فعلن فع ۔
ایضاً ۔۔۔۔۔۔۔۔۔۔۔۔۔۔
شاعر ـ غلام محمد وامِق، محراب پور سندھ ـ
فروری 1984ء میں کہی گئی غزل ـ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
