ناصر کاظمی کی زمین میں غزل
شاعر ۔ غلام محمد وامق
مجھے وفاؤں کا درس دے کر وفا کو بدنام کر گیا وہ ۔
نسیم سحری کا جھونکا آیا گلوں کو چھو کر گزر گیا وہ ۔
نہیں ہے شکوہ مجھے ذرا بھی جو تار دامن ہوا ہے میرا ۔۔۔
مجھے تو افسوس ہے کہ خنجر اٹھا کے مجھ پر ٹھہر گیا وہ ۔
گئے دنوں کے نقوش دل سے مٹانا چاہوں مٹاؤں کیسے ؟
جہاں بھی دیکھوں میں صحنِ گلشن میں اپنا ہی رنگ بھر گیا وہ ۔
خدا یا کیسا عجیب ہے وہ، اثر جو اس پر ذرا نہیں ہے ۔
ہمارے دل کو تو چند لمحوں میں غم سے معمور کر گیا وہ ۔
میرا نشیمن ہو کوئی کیسے کہ بجلیوں کی نظر ہے مجھ پر۔۔
جہاں بھی رکھّے ہیں چند تنکے، تو جل ہی آخر شجر گیا وہ ۔
ہے انتہائے کمال یعنی ، ہے ابتدائے زوال لوگو ۔۔۔۔
یہ ہی ہے دستور اس جہاں کا جدھر سے آیا ادھر گیا وہ ۔
ہمارے دل میں بھی خواہشوں کے ہزاروں طوفاں مچل رہے ہیں ۔
مگر سہانا جو خواب دیکھا سحر سے پہلے بکھر گیا وہ ۔
قریب ہے وقت اب وہ جاناں میرا پتہ گر کسی نے پوچھا ۔۔
کہیں گے وامق عجب تھا یارو کہ ہنستے ہنستے ہی مر گیا وہ ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفاعلاتن مفاعلاتن مفاعلاتن مفاعلاتن
بحر ۔ جمیل مثمن سالم ۔
شاعر ۔ غلام محمد وامق، محراب پور سندھ ۔
نومبر 1983ء میں کہی گئی غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
