××× غزل (جدید) ×××
غلام محمد وامِق
ہم نئے طور سے دنیا کی ادا سمجھیں گے ۔
سارے عنوان نئے معنی نئے سوچیں گے ۔
قحط انسان کا دنیا میں پڑا ہے ایسا ۔
اہلِ دانش نہیں پائیں گے ہمیں ڈھونڈیں گے ۔
علم و دانش ہوئے محصور جَہَل کے ہاتھوں ۔
بحرِ ظلمات میں لازم ہے کہ ہم ڈوبیں گے ۔
تہمتِ کفر نہ لگ جائے کہِیں ہم پر بھی ۔
گفتگو کے لئے اسلوب نئے ڈھونڈیں گے ۔
ہم سے ٹکراؤ نہیں ورنہ بقولِ شاعر ۔
"ہم تو ڈوبے ہیں صنم تم کو بھی لے ڈوبیں گے" ۔
درسِ اصلاح بہت خوب ہے لیکن وامِق ۔
گونگے بہرے ہیں یہاں ، کس کی زباں سمجھیں گے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فاعلاتن فَعِلاتن فَعِلاتن فِعلن ۔
بحر ۔ رمل مثمن مخبون محذوف مقطوع ۔
شاعر ۔ غلام محمد وامِق ۔
مورخہ 12، اپریل سال 2019ء کو کہی گئی غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
