:::::::: غزل ::::::
غلام محمد وامِق
اہلِ نظر کو عقل سکھانے لگے ہیں لوگ .......
سورج کو بھی چراغ دکھانے لگے ہیں لوگ .......
جن سے عیوب ان کے عیاں ہونے کا ہے ڈر ...
ایسے نشان سارے مٹانے لگے ہیں لوگ .......
کرتے ہیں قتل دیکھئے، پھر آ کے لاش پر ...
رو رو کے جھوٹے آنسو بہانے لگے ہیں لوگ ...
سیکھا نہیں ہے خود تو کسی سے بھی کچھ، مگر ...
اوروں کو علم و عقل سکھانے لگے ہیں لوگ ...
پہلے نگاہِ کرم کے رہتے تھے منتظر ...
اب تو نظر ، نظر سے چرانے لگے ہیں لوگ ...
بدظن ہیں لوگ اتنے کہ حالت نہ پوچھئے ...
اپنوں سے دل کا حال چھپانے لگے ہیں لوگ ...
سچ بات مُنہ پہ کہنے کی عادت جو پڑ گئی ...
اب جان اپنی، ہم سے چھڑانے لگے ہیں لوگ ...
وامِق! عجیب جھوٹ کا عالَم ہے، آج کل ...
دانستہ دِن کو، رات بتانے لگے ہیں لوگ ...
ــــــــــــــــــــــــــــــــــــــــــــــــــــ
مفعول فاعلات مفاعیل فاعلات ۔
مفعول فاعلات مفاعیل فاعلن ۔
بحر ۔ مضارع مثمن اخرب مکفوف محذوف ۔
شاعر ۔ غلام محمد وامِق، محرابپور سندھ ـ
جنوری سال 1989ء میں کہی گئی میری غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔