قطعہ - خاص ادا
غلام محمد وامِق
کچھ تو ہوتا ہے اثر شدّتِ جذبات کا بھی
اور کچھ لوگوں کی اپنی بھی انا ہوتی ہے ۔
چند لمحوں میں نہیں ہوتا کبھی شیدا کوئی
اس کے پیچھے بھی کوئی خاص ادا ہوتی ہے
--------------------
فاعلاتن فعلاتن فعلاتن فَعِلن
رمل مثمن مخبون محذوف مقطوع
30 مئی 2026ء کو کہا گیا
سازشیں کرنے والوں کے لیے ربّ العزت کے ارشادات ۔
بُری چالیں کسی اور کو نہیں خود اپنے چلنے والوں ہی کو گھیرے میں لے لیتی ہیں ۔
لوگو تمہاری سرکشی کا وبال تمہارے ہی اوپر آنے والا ہے ۔
الداعی الی الخیر - غلام محمد وامِق
عالمگیر کیف کے مصرعے " اچھی صورت بھی کیا بری شے ہے" کی تضمین پر مزاحیہ قطعہ
شاعر - غلام محمد وامِق
"اچھّی صورت بھی کیا بری شے ہے "
ہر کوئی تاڑنے کے پیچھے ہے
خود کو حاصل اگر نہ ہو پائے
ہر کوئی مارنے کے پیچھے ہے -----------------------------
فاعلاتن مَفاعِلن فِعلُن
بحر- خفیف مسدس مخبون محذوف مقطوع ۔
مورخہ 09 مئی 2026ء بروز ہفتہ، کہا گیا قطعہ
قطعہ - یومِ مئی
شاعر - غلام محمد وامِق
صاحب نے بُلایا ہے ہمیں چھٹی کے دن بھی ۔
مزدور کے بیٹے نے کہا ماں سے یہ آ کر ۔
ہے یومِ مئی، آج ہمیں کام بہت ہے ۔
ممکن ہے کہ ہم آئیں بہت دیر سے گھر پر ۔
ــــــــــــــــــــــــــــــــ
مفعول مفاعیل مفاعیل فعولن
ہزج مثمن اخرب مکفوف محذوف
مورخہ یکم مئی 2026ء بروز جمعۃ المبارک کہا گیا قطعہ ۔
