★★★ غــــــزل ★★★
غلام محمد وامِق
رازِ دروں سے کوئی تو پردہ اٹھا سکے ...
دِل سے کوئی تو دِل کا تعلق بتا سکے ...
تیری خوشی کے واسطے جو سَر کٹا سکے ۔۔۔
ہے کون میری طرح جو نخرے اٹھا سکے؟ ...
اِک پھول اُس کے ہاتھ میں ہے اِس خیال سے ...
بلبل کو میرے سامنے، نیچا دکھا سکے ...
تیری تباہ کار جوانی کے سامنے ...
دِل کو کہاں مجال کہ وہ تاب لا سکے ...
یہ کیا ستم کہ شہر میں رہتے ہوئے کبھی ۔۔۔
ہم کو بلایا اور نہ خود ملنے آ سکے؟ ...
لاکھوں نقوشِ ماضی مٹائے تو ہیں، مگر ...
دِل سے تمہاری یاد نہ ہرگز مٹا سکے ...
وامِق ! تمہارے پیار میں ہر رنج و غم سہا ...
لیکن غمِ فراق کبھی نا اٹھا سکے ...
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفعول فاعلات مفاعیل فاعلن ۔
مضارع مثمن اخرب مکفوف محذوف ۔
شاعر ۔ غلام محمد وامق ۔
مارچ 1985ء میں کہی گئی غزل ـ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
