=== عید کے دن ===
غلام محمد وامِق
عید تم سے جو نہ مل پائیں گے ہم عید کے دن ۔
اس سے بڑھ کر بھی کوئی ہوگا ستم عید کے دن ۔
تجھ کو ڈھونڈیں گی مری آنکھیں صنم عید کے دن ۔
تیرا دیدار خدا کا ہے کَرَم عید کے دن ۔
لوگ احباب سے ملتے ہیں گلے خوش ہو کر ۔
میری تنہائی مجھے دیتی ہے غم عید کے دن ۔
صرف لوگوں کو دکھانے کو ہی مل لیتے مجھے ۔
تم نے اتنا نہ کیا مجھ پہ کَرَم عید کے دن ۔
دولتِ دید سے محروم جو رکھّا تُو نے ۔
عید میری نہ ہوئی تیری قَسَم عید کے دن ۔
عید کے دن جو تری دید سے محروم رہے ۔
جانِ من خاک میں مل جائیں گے ہم عید کے دن ۔
منتظر ہیں کھلی آنکھیں ہیں کھلے در کی طرف ۔
کیسا منظر ہے مرا نکلا ہے دم عید کے دن ۔
عید کا چاند جو دیکھا تو دعا کی وامِق ۔
اے خدا مجھ کو ہو دیدارِ صنم عید کے دن ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فاعلاتن فَعِلاتن فَعِلاتن فَعِلن ۔
فاعلاتن فَعِلاتن فَعِلاتن فِعلن ۔
بحر ۔ رمل مثمن سالم مخبون محذوف ۔
شاعر ۔ غلام محمد وامِق ۔
جولائی سال 1984ء میں کہی گئی غزل ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
