★★★ حمدِ باری تعالیٰ ★★★
غلام محمد وامِق
تُونے بنایا آسماں، تُونے بنائی یہ زمیں ...
تیرے ہی آگے اے خدا جھکتی ہے میری بھی جبیں ۔۔۔
دنیا غموں کا گھر سہی، دل کو مگر ہے یہ یقیں ...
جس میں ہو تیری یاد پھر رہتا نہیں وہ دل حزیں ...
دِل کا چمن یوں کھِل اٹھے، جیسے کہ آجائے بہار ...
یادِ خدا جو دیکھئے ہو جائے دل میں جاگزیں ...
گرچہ نظر سے ہے نہاں، تیرا نہ کوئی رازداں ...
دیدہء بینا ہو اگر ، تیرا. نظاره ہر کہیں ...
تیرا کَرَم ہے اے خدا ، ہر چیز پر قادر ہے تُو ۔۔۔
چاہے جسے اونچا کرے، چاہے کرے غرقِ زمیں ...
رحمت کو تیری دیکھ کر آئے ہیں تیرے در پہ ہم ...
بخشے تو ہم بھی جائیں گے، رہتا ہے یہ دل میں یقیں ...
ہوجائے گر. تیرا. کرم، رہ جائے وامِق کا بھرم ...
مِٹ جائیں دل کے داغ سب، بن جائے گی دنیا حسیں ...
ـــــــــــــــــــــــــــــــــــــ
مستفعِلن مستفعِلن مستفعِلن مستفعِلن ۔
بحر ۔ رجز مثمن سالم ۔
شاعر ـ غلام محمد وامِق، محرابپور سندھ.
نومبر 1980ء میں کہی گئی حمد شریف ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
