=== نعت رسولِ اکرمﷺ ===
غلام محمد وامِق
دنیا سے ظلمتوں کو مٹایا ہے آپ نے ـ
جب علم کا چراغ, جلایا ہے آپ نے ....
خلق عظیم آپ کا, دنیا میں بے مثال ـ
انسانیت کا درس, پڑھایا ہے آپ نے ...
مغلوب ہوکے آئے جو, اسلام کے حریف ۔۔۔
سینے سے ان کو اپنے, لگایا ہے آپ نے....
لات و منات توڑ کے, ظلمت کی رات میں ـ
توحید کا چراغ جلایا ہے، آپ نے......
رنگ و نسَب میں کوئی بھی بر تر نہیں یہاں ۔۔۔
چھوٹے بڑے کا فرق, مٹایا ہے آپ نے ...
یکسانیت کا درس دیا ہم کو اس طرح ـ
خُدام کو بھی ساتھ بٹھایا ہے آپ نے ...
دورِ قدیم ، میں رہی تذلیل کا نشاں ۔۔۔
عورت کو گھر کی شمع بنایا ہے آپ نے ...
ہر گوشہء حیات کی تعلیم دی ہمیں ـ
بھٹکے ہوؤں کو رستہ دکھایا ہے آپ نے ...
جھکتا نہیں کبھی کسی باطل کے سامنے ـ
مومن کا وہ مزاج, بنایا ہے آپ نے ....
وامق, کسی پیام کی حاجت نہیں رہی ـ
اللہ, کا ہر پیام سنایا ہے, آپ نے ...
ـــــــــــــــــــــــــــــــــــــــــــــ
مفعول فاعلات مفاعیل فاعلن ۔
بحر ۔ مضارع مثمن اخرب مکفوف محذوف ۔
ستمبر 1982ء، میں کہی گئی نعت ۔
شاعر ۔ غلام محمد وامِق، محرابپور سندھ.
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
