+++ غزل +++
غلام محمد وامِق
کہاں ہیں اب جو محبّت میں مارے جاتے ہیں ؟
عجیب دور ہے دہشت میں مارے جاتے ہیں ۔
مخالفین تو ہوتے ہیں سرخرو اکثر ۔
یہ ایک ہم کہ حمایت میں مارے جاتے ہیں ۔
کہ بد کلامی سے مرتا نہیں ہے کوئی مگر ۔
نفیس لوگ نفاست میں مارے جاتے ہیں ۔
تمام عُمر لڑائی میں جو رہے غازی ۔
وہ ایک رات عبادت میں مارے جاتے ہیں ۔
یہ اہلِ حق نہیں مرتے ہیں دشمنوں سے کبھی ۔
فقیر لوگ مروّت میں مارے جاتے ہیں ۔
لَہُو پکارے گا اُن کا بھی روزِ محشر میں ۔
جو تیرے عہدِ امارت میں مارے جاتے ہیں ۔
جو چاہتے ہیں کہ انصاف ہو عدالت میں ۔
وہی تو لوگ عدالت میں مارے جاتے ہیں ۔
لٹیرے بخشے گئے " قومی مفاہمت" کے سبب ۔
شریف لوگ شرافت میں مارے جاتے ہیں ۔
یہ بے شمار جگر گوشے ماؤں کے وامِق ۔
فصول شوقِ شہادت میں مارے جاتے ہیں ۔ #
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفاعلن فَعِلاتن مفاعلن فَع٘لن ۔
بحر۔ مجتث مثمن مخبون محذوف مسکن ۔
شاعر ۔ غلام محمد وامِق ۔
مورخہ 10، اکتوبر سال 2007ء میں کہی گئی غزل ۔
# ۔ وہ عناصر جو جہاد سمجھ کر اپنے ہی مسلمانوں کو مارتے ہیں، اور خود بھی مارے جاتے ہیں ۔ (افسوس) ۔
نظرِ ثانی ۔ 6 جون سال 2024ء بروز جمعرات ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔