غلام محمد وامِق
اتنا کرم تو، مجھ پہ مرا نامہ بر کرے ...
خود بھی زباں سے حال بیاں مختصر کرے ...
مرنے کے بعد بھی وہ جفا اس قدر کرے ۔۔۔
رہ میں مرا مزار ہے وہ درگزر کرے ۔۔۔
پھر تو مزا ہے، باہمی گفت و شنید کا ...
نکلے زباں سے بات، تو دل پر اثر کرے ...
ہم کو کلامِ یار کے، سننے کی آرزو ...
اور وہ کہ بات بھی جو کرے مختصر کرے ...
منزل نہیں ملے گی اسے دیکھنا کبھی ۔۔۔
گمراہ خود کسی کو، اگر راہبر کرے؟ ...
اِک تو فراقِ یار سے دل پر مرے ہے بوجھ ۔۔۔
کچھ مضطرب یہ دل کو نسیمِ سحر کرے ۔۔۔
آخر بجھی ہے راہ کی، ہر شمعِ منتظر ...
کب تک یہ انتظار تیرا چشمِ تر کرے؟ ...
سورج بھی کہہ رہا ہے یہ ہی ڈوبتے ہوئے ...
کوئی اکیلا دشت میں، کب تک سفر کرے؟ ...
بڑھتی رہے گی روشنی، ہردم چراغ کی ...
چاہے شبِ فراق، ستم جس قدر کرے ...
یہ معجزہ بھی، عشق میں دیکھا ہے بارہا ...
خود جستجوئے شوق میں منزل سفر کرے ...
وامِق، تمہارے ساتھ جو جلتا ہے آفتاب ...
یعنی شبِ فراق کو، روشن، قمر کرے ...
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مفعول فاعلات مفاعیل فاعلن ۔
بحر۔ مضارع مثمن اخرب مکفوف محذوف
مئی 1983ء، میں کہی گئی غزل
شاعر ـ غلام محمد وامِق، محراب پور سندھ ...
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
