***** غزل *****
غلام محمد وامِق
آتا ہے جینے کا بھی ہنر، اتفاق سے ـ
مِلتا ہے کوئی اہلِ نظر، اتفاق سے ـ
اُن سے ہوا تھا پیار، مگر اتفاق سے ـ
بس یوں ہی اٹھ گئی تھی نظر اتفاق سے ـ
چلنے کو چل رہے تھے مگر کچھ پتا نہ تھا ۔
دیکھا تو کٹ گیا تھا سفر، اتفاق سے ـ
بستی اجڑ کے رہ گئی تجھ بن وہ دیکھنا ـ
تیرا وہاں سے ہو جو گزر اتفاق سے ـ
ہم نے تو رازِ دل کو چھپایا بہت مگر ـ
دنیا کو ہو گئی ہے خبر اتفاق سے ـ
میں جانتا ہوں، ساتھ میں ہوگا رقیب بھی ـ
مجھ سے وہ ملنے آئیں اگر اتفاق سے ۔
مجھ سے وہ آئے ملنے یہ ممکن نہیں مگر ـ
بس ہوگیا تھا، اُن کا گزر اتفاق سے ـ
اپنا بھی نام شاملِ تفتیش ہو گیا ـ
ہم بھی چلے گئے تھے اُدھر اتفاق سے ـ
خوشبو سی بس رہی ہے، فضاؤں میں ہرطرف ـ
شاید وہ آ رہے ہیں، اِدھر اتفاق سے ـ
وامِق ! نہیں کمالِ سخن، اِس قدر ہمیں ـ
دِل پر ہوا ہے، اُن کے اثر اتفاق سے ـ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شاعر۔ غلام محمد وامق ۔
مئی 1985، میں کہی گئی غزل
مفعول فاعلات مفاعیل فاعلن
بحر ۔ مضارع مثمن اخرب مکفوف محذوف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
