★★★ نظم ـ موسم بہار ★★★
غلام محمد وامق
دیکھو تو کتنا پیارا موسم بہار آیا ۔
پھول و شجر پہ دیکھو کیسا نکھار چھایا ۔
کتنے سہانے ہوگئے، اپنے یہ روز اور شب ...
خوشبو میں جیسے کھوگئے اپنے یہ روز اور شب ...
چڑیوں کی چُو چُو کہیں، کوئل کی کُوکُو کہیں ...
بولے پپیہا پی پی ، گلشن اداس نہیں ...
موسم نے پہنے گہنے، نئے نئے رنگ آئے ...
پنچھی بھی اپنے اپنے ساجن کے سنگ آئے ...
خوشبو فضاؤں میں ہے، ہر دل میں آرزو ہے ...
اپنے مطلوب کی تو، سب کو ہی جستجو ہے ...
پھولوں کے گِرد دیکھو بھؤنرا منڈلائے کیسے ...
من کی جو آرزو ہے، وہ لب پہ لائے کیسے؟ ...
شاخوں پہ بُور آیا، آنکھوں میں نُور آیا ...
نینوں سے نین ملے، دل میں سرور آیا ...
رنگوں میں ڈوبا ہوا ہر گُل مستی میں ڈولے ...
مست ہوائیں آئیں، بلبل پھولوں پہ بولے ...
گُلشن سرسبز دیکھو، رنگیں ہر پیرہن ہے ...
موروں کے ناچ میں بھی کیسا مستانہ پن ہے ...
خوش ہے ہر ایک ذی روح، انساں مسرور سارے ...
وامِق ! خدا کا عطیہ، موسم بہار پیارے ...
دیکھو تو کتنا پیارا موسم بہار آیا ۔
پھول و شجر پہ دیکھو موسم بہار چھایا ۔
ـــــــــــــــــــــــــــــــــــــــــ
شاعر ـ غلام محمد وامِق، محرابپور سندھ ـ
مورخہ 15 ـ مارچ، 2004 ء کو کہی گئی ـ
بحر ۔ مفعول فاعلاتن مفعول فاعلاتن
رمل مثمن مشکول مسکّن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔
